E Orden di Oranje-Nassau a keda instituí pa lei riba 4 di April 1892. Despues di e Militaire Willems-Orde i e Orde van de Nederlandse Leeuw, e ta e di tres órden Neerlandes. Su Mahestad La Reina ta Grootmeester (Gran Maestro) di e Orden.

Na 1841 Rei Willem II como Gran Duque di Luxemburgo a instituí e Orde van de Eikenkroon. Aunke esaki no tabatá un órden Neerlandes, regularmente tabata otorga condecoracionnan den e Orden van de Eikenkroon na Hulandesnan i diplomáticonan estranhero. Despues di fayesimento di Rei Willem III na 1891 Luxemburgo a bira un estado independiente. Resultado tabata cu e hefe di estado Neerlandes ya no por a otorgá condecoracionnan den e Orde van de Eikenkroon mas.

E nesecidad pa un órden Neerlandes nobo – e di tres – a bira evidente. Esei tabata necesario pa  por duna especialmente diplomáticonan estranhero un condecoracion. Pero tambe pa di e manera aki duna personanan di clase i rango mas abao un muestra di aprecio. Riba 4 di April 1892, e tempo cu Reina Emma a fungi como Regentes (Regentesa) di Reino, a instituí e Orden di Oranje-Nassau.

Revision

Na 1994 – despues di casi trinta aña di discusion – e sistema Neerlandes di condecoracion a keda radicalmente revisa. Desde e Ocashon General di 1996 pa prome biaha e condecoracionnan a tuma lugar segun e funcionamento di e sistema revisa. Cu e revision e legislador tabatín mira riba un sistema di condecoracion mas democrático, caminda ya no tabata tin lugar pa automatismo. A los haltura di e condecoracionnan for di rango i posicion social. En principio tur hende den nos comunidad por haya un condecoracion. Ta asina cu ta otorga un condecoracion solamente a base di méritonan  personal extraordinario na beneficio di comunidad.

Te 1996 e Orden di Oranje-Nassau tabata consisti di cinco grado. Ademas, te 1996 tabatin Medayan di Honor vincula na e Orden. Esnan cu a haya e Medaya di Honor, no tabata inclui den en Orden. Desde 1996 no ta otorga e Medayanan di Honor mas, mientras cu e Orden di Oranje-Nassau awor tin seis grado :

• Ridder Grootkruis
• Grootofficier
• Commandeur
• Officier
• Ridder
• Lid (Miembro)