Ademas di datonan personal general, nan ta pidi datonan riba area di trabou i e funshon di e kondekorado. Si e persona proponí ta traha pa  salario, mester agregá n’e proposishon un deklarashon di e dunadó di trabou for di kual por dedusí ku esaki no tin inkonvenensia ku e otorgamentu di un kondekorashon Real.

Asina por evitá ku ta otorgá e kondekorashon, mientras ku sièrto hechonan a tuma lugá den e funshon prinsipal òf ta tuma lugá, ku por ta motibu di no otorgá un kondekorashon.

Finalmente, e relashon entre e proponedor pa ku e kondekorado ta di importansha.

Motivashon

E motivashon ta e parti di mas importante di e proposishon. Den esaki mester indiká ta kual ta e méritonan espesial di e kondekorado i pakiko esakinan ta espesial.
Na promé lugá e motivashon mester kontené un resúmen di e diferente sorto di aktividatnan di e persona konserní. Ademas ta rekomendabel pa menshoná den kual periodo e kondekorado tabatá aktivo, i pa indiká huntu ku kada un di e méritonan, kuantu tempu e aktividatnan en kuestion a eksigí òf ta eksigí.

Entregá na tempu

Di gran interes ta pa entregá e proposishon na tempu. Si ta e intenshon di entregá e kondekorashon durante e ‘lintjesregen’ na okashon di Aña di La Reina, ta rasonabel  pa entregué prome ku 1 di yüli di e aña  anterior serka e alkalde. Si e proponedor ta aspirá pa un entrega di e kondekorashon na un okashon interino, ta rekomendabel ku e mantené un término di minimal mitar aña.

Solamente den kasonan eksepshonal, por ehèmpel na okashonnan ku no por premirá, manera enfermedat grave di e kondekorado, ta eksistí e posibilidat pa desviá di e término di konsiderashon. Ta rekomendabel pa den e kaso ei manda un deklarashon di e médiko ku ta traté, huntu ku e proposishon.